Lavaforming er framlag Íslands á Feneyjatvíæringnum í arkitektúr 2025.  Á sýningunni Lavaforming er sögð saga framtíðarsamfélags sem þróar framsæknar lausnir í mannvirkjagerð. Hraunrennsli er beislað, nýtt sem byggingarefni og tekst með því að umbreyta staðbundinni ógn í auðlind. Arkitektastofan s.ap arkitektar, þverfagleg rannsóknarstofa með áherslu á tilgátuverkefni framtíðarinnar, eru höfundar Lavaforming og vinna sýninguna ásamt hópi sérfræðinga og þverfaglegra samstarfsaðila. 

Arnhildur Pálmadóttir, arkitekt og listrænn stjórnandi Lavaforming. 

 „Í okkar sögu árið 2150 höfum við beislað hraunrennslið líkt og við gerðum með gufuaflið á 20. öld. Við vörðum söguna með atburðum sem höfðu áhrif á þróun og tækni en markmið hennar er að sýna að arkitektúr getur verið krafturinn sem endurhugsar og mótar nýja framtíð. Hraunflæði getur innihaldið nóg byggingarefni fyrir grunnstoðir heillrar borgar sem rís á nokkrum vikum án skaðlegrar námuvinnslu og óendurnýtanlegrar orkuöflunar.“

Þverfaglegt teymi Lavaforming. Björg Skarphéðinsdóttir, Arnhildur Pálmadóttir, Arnar Skarphéðinsson, Jack Armitage og Andri Snær Magnason

Sýningarteymi Feneyjatvíæringsins kemur frá s. ap arkitektum, sem er þverfagleg rannsóknarstofa með áherslu á tilgátuverkefni framtíðarinnar, og þverfaglegra samstarfsaðila. Í sýningarteyminu eru Arnhildur Pálmadóttir, Arnar Skarphéðinsson, Björg Skarphéðinsdóttir, Sukanya Mukherjee, Jack Armitage og Andri Snær Magnason. Um grafíska hönnun sér hönnunarstofan Studio Studio og er Markús Þór Andrésson, deildarstjóri sýninga og miðlunar hjá Listasafni Reykjavíkur ráðgjafi sýningarinnar.  Miðstöð hönnunar og arkitektúrs hefur umsjón með framkvæmd verkefnisins. Fáðu frekari upplýsingar um teymið hér.

Feneyjatvíæringur í arkitektúr er einn mikilvægasti viðburður á sviði arkitektúrs á heimsvísu. Arkitektúr hefur verið hluti af Feneyjatvíæringnum í listum frá árinu 1968, en fékk sinn eigin vettvang árið 1980. Árið 2024 var í fyrsta sinn kallað eftir tillögu í opnu kalli að sýningu Íslands fyrir tvíæringinn í arkitektúr í Feneyjum sem stendur yfir frá 10. maí til 23. nóvember 2025. Mennta- og menningarmálaráðuneyti Íslands fól Miðstöð hönnunar og arkitektúrs umsjón með framkvæmd verkefnisins. Lestu þér meira til um Feneyjatvíæringinn í arkitektúr og framkvæmdina hér. 

Smelltu hér hér að sjá staðsetningu skálans á korti

Castello 2125 (Ramo de la Tana), 30122 Feneyjum

Feneyjatvíæringur í arkitektúr

Feneyjatvíæringur í arkitektúr er einn mikilvægasti viðburður á sviði arkitektúrs á heimsvísu. Arkitektúr hefur verið hluti af Feneyjatvíæringnum í listum frá árinu 1968, en fékk sinn eigin vettvang árið 1980.

Upphaflega tók arkitektatvíæringurinn í arkitektúr yfir örlítinn hluta hinnar sögufrægu skipasmíðastöðvar Arsenale, en samfara vexti arkitektatvíæringsins hefur sá hluti þróast, stækkað og verið hluti af sýningarrými myndlistar- og arkitektatvíæringsins allar götur síðan, ásamt Giardini sýningarsvæðinu. Á tvíæringnum koma saman aðilar sem vinna á vettvangi arkitektúrs og þróun manngerðs umhverfis, t.a.m. fulltrúar ríkja, sveitarfélaga, arkitektar og hönnuðir, sérfræðingar á sviði byggingartækni, framleiðendur byggingarefna, fjárfestar og þróunaraðilar bygginga svo einhverjir séu nefndir. Árið 2023 voru 63 þjóðir sem tóku þátt í tvíæringnum og voru sýningagestir yfir 285.000 talsins og komu þeir allstaðar að úr heiminum. 

Árið 2023 samþykkti alþingi aðgerðaráætlun í málefnum hönnnunar og arkitektúrs um þátttöku Íslands í Feneyjartvíæringnum og hófst undirbúningsvinna strax í kjölfarið. Árið 2024 var í fyrsta sinn kallað eftir tillögu í opnu kalli að sýningu Íslands fyrir tvíæringinn í arkitektúr í Feneyjum sem stendur yfir frá 10. maí til 23. nóvember 2025. Mennta- og menningarmálaráðuneyti Íslands fól Miðstöð hönnunar og arkitektúrs umsjón með framkvæmd verkefnisins. Halla Helgadóttir framkvæmdastjóri Miðstöðvar hönnunar og arkitektúrs var skipaður Comissioner og Gerður Jónsdóttir ráðinn inn sem verkefnastjóri.

Strax var hafist handa við að búa til skipurit verkefnisins þar sem hlutverk og ábyrgð hvers og eins var skilgreint. Sérstaklega var horft til kollega okkar á Norðurlöndum og var ákveðið að skipa stýrihóp sem hefur það hlutverk að móta stefnu og nálgun við verkefnið, skilgreina markmið, árangursskilyrði og markhóp auks þess að veita sýningarteymi aðstoð og ráðgjöf eins og þurfa þykir.

Í febrúar 2024 var skipaður átta manna stýrihópur fagfólks og hagaðila sem samþykktur var af stjórn MH&A. 

Fyrir hönd Miðstöðvar hönnunar og arkitektúrs
Halla Helgadóttir framkvæmdastjóri og formaður stýrihóps.

Fyrir hönd Listaháskóla Íslands
Massimo Santanicchia, arkitekt, prófessor og deildarforseti í arkitektúr við LHÍ.

Fyrir hönd Arkitektafélags Íslands
Magnea Guðmundsdóttir, arkitekt, Teiknistofan Stika

Fyrir hönd Félags íslenskra landslagsarkitekta
Daníel Jakobsson, landslagsarkitekt, Landslag

Fyrir hönd Félags húsgagna- og innanhússarkitekta
Silja Ósk Leifsdóttir, innanhúsarkitekt, Nordic Office of Architecture

Fyrir hönd SAMARK
Sigurður Einarsson, arkitekt og hönnunarstjóri, Batteríið

Fyrir hönd Íslandsstofu
Kristjana Rós Guðjohnsen, fagstjóri lista og skapandi greina

Fyrir hönd menningar- og viðskiptaráðuneytis
Arna Kristín Einardóttir, skrifstofustjóri (Kristrún Heiða Hauksdóttir, sérfræðingur feb-sep '24)

Stýrihópur fundaði a.m.t. einu sinni í viku í undirbúningsferlinu en þá var bæði verið að ákveða nálgun verkefnis og nálgun við val á fulltrúa Íslands 2025. Að lokum var ákveðin sú leið að senda út opið kall þar sem leitað var eftir hugmyndum að sýningu Íslands á Feneyjatvíæringnum 2025. Alls bárust tólf hugmyndir og valdi stýrihópur fjórar þeirra til að verða kynntar frekar fyrir þeim. Af þessum fjórum tillögum komst stýrihópur að þeirri niðurstöðu að velja sýninguna Hraunmyndanir (e. Lavaforming) sem framlag Íslands á Feneyjatvíæringnum í arkitektúr 2025. 