Rammagerðin opnar alíslenskt hönnunarhús að Laugavegi 31

Rammagerðin hefur leigt húsnæðið á Laugavegi 31, sem gengið hefur undir nafninu Kirkjuhúsið, undir nýja flaggskipsverslun fyrirtækisins. Nýja verslunin mun auka enn frekar möguleika Rammagerðarinnar til áframhaldandi samstarfs við hönnuði, en í verslunum Rammagerðarinnar er fjölbreytt framboð af vörum unnar í samstarfi við öflugan hóp íslenskra hönnuða.

Verslunin er um 600 m2 að stærð og verður vettvangur fyrir þann hönnunarheim sem Rammagerðin veitir aðgang að. Í tilkynningu frá Rammagerðinni segir að „verslunin á Laugavegi verði alíslenskt hönnunarhús í líkingu við sambærileg erlend hús, eins og Illums Bolighus í Kaupmannahöfn. Hér er stigið mjög merkilegt skref fyrir íslenska hönnun og framleiðslu og ljóst er að verslunin verður glæsilegur gluggi inn í heim skapandi greina á Íslandi. Rammagerðin er stolt af því að vera eina fyrirtækið á Íslandi sem vinnur alfarið með íslenskum hönnuðum og framleiðendum og hefur sinnt því hlutverki næstum samfellt frá stofnun fyrirtækisins fyrir 83 árum.“

Húsnæðið að Laugavegi 31 var teiknað af Einari Erlendssyni húsasmið og reist af kaupmanninum Marteini Einarssyni sem seldi þar vefnaðar- og matvöru. Kristnisjóður keypti húsið árið 1994. Núverandi eigendur eignuðust húsið haustið 2020 og hafa gagngerar endurbætur staðið yfir síðan, þar sem húsið hefur verið fært til upprunalegs útlits með nútímaþarfir í huga.

Hönnun nýju verslunarinnar verður í höndum Basalt arkitekta, sem hönnuðu jafnframt verslun Rammagerðarinnar í Hörpu. Áætlað er að verslunin opni í haust og bætist þar við aðrar verslanir Rammagerðarinnar í Reykjavík en þær eru á Skólavörðustíg og í Hörpu. Auk þess rekur Rammagerðin tvær verslanir á Keflavíkurflugvelli og eina á Hvolsvelli. Rammagerðin hefur starfrækt verslanir með íslenskt handverk og, í seinni tíð, íslenska hönnun frá árinu 1940.