Design Group Italia vinnur Compasso d’Oro-verðlaunin fyrir Bláa lónið

Sigurður Þorsteinsson og Design Group Italia vinnur Compasso d’Oro-verðlaunin fyrir Bláa lónið, en verðlaunin þykja virtustu og eftirsóttustu hönnunarverðlaun Ítalíu. Verðlaunin hafa verið veitt á tveggja ára fresti frá árinu 1954.

Sigurður er annar tveggja aðaleigenda hönnunarstofunnar sem er staðsett í Mílanó en hann hefur leitt vinnuna með Bláa lóninu frá árinu 1992 þegar hann gekk til liðs við Design Group Italia. Þetta kemur fram í viðtali í Hús&Híbýli.

„Það er sjaldgæft að óáþreifanleg verkefni, eins og langtíma hönnunarstefna á borð við þá sem við höfum unnið með Bláa lóninu, fái þessa viðurkenningu. Það gerir verðlaunin enn þá sérstakari fyrir okkur,“ segir Sigurður.

Í viðtalinu segir Sigurður Compasso d’Oro-verðlaunin í raun vera viðurkenningu á hlutverki hönnunarhugsunar, þ.e. design thinking, í stefnumótun fyrirtækja og á áralöngu samstarfi þeirra Gríms Sæmundsen, stofnanda og forstjóra Bláa lónsins. Það sé ekki verið að verðlauna DGI og Bláa lónið fyrir eitthvað eitt tiltekið verkefni heldur alla hugmyndafræðina sem liggur að baki áratuga vinnu.

Bláa lónið hlaut einmitt viðukenninguna Besta fjárfesting í hönnun á Hönnunarverðlaunum Íslands 2017.