Vinnustofudvöl Ýrúrarí opnar í dag í Hönnunarsafni Íslands

Ýr Jóhannsdóttir textílhönnuður hefur komið sér fyrir í vinnustofu Hönnunarsafns Íslands og opnar í dag, 22. janúar milli 12-17. Þar mun hún vinna framhald af verkefninu Peysa með öllu, sem er tilnefnt til Hönnunarverðlauna Íslands 2020. Ýr starfar undir nafninu Ýrúrarí og eru verk hennar að mestu unnin í prjóni og í þeim mætast húmor, handverk og hreyfing.

Á vinnustofu Ýrúrarí á Hönnunarsafni Íslands mun fara fram vinna að framhaldi verkefnisins "Peysa með öllu" sem hún vann í samstarfi við fatasöfnun Rauða Krossins fyrir HönnunarMars 2020. Í "Peysu með öllu" vann Ýrúrarí með peysur sem lent höfðu í óhöppum í fyrra lífi og voru því ekki boðlegar til sölu í verslunum Rauða Krossins.

Enn safnast upp töluvert magn af ósöluhæfum peysum til fatasöfnunarinnar og þörf er á fleiri hugum og höndum í verkið. Framhald verkefnisins er því Peysa með öllu fyrir alla. Hér verður unnið áfram með aðgengilegar og skapandi fataviðgerðir með miðlunarleiðum sem gera fataviðgerðirnar persónulegar og skemmtilegar. 

Markmið verkefnisins er að stuðla að lengri samverutíma okkar með þeim fötum sem við eigum nú þegar og koma í veg fyrir að þeim sé hent um leið og örlítið er farið að sjá á þeim. Gestum og gangandi er boðið að kynna sér ferlið og jafnvel prufa sjálf fataviðgerðir sem vekja áhuga þeirra. 

Fólki verður boðið að taka að sér peysu, koma á námskeið í fataviðgerðum og fleira skemmtilegt sem auglýst verður síðar.

Verkefnið er hluti af lokaverkefni Ýrar í listkennsludeild Listaháskóla Íslands.