Drög stefnu í málefnum hönnunar og arkitektúrs í samráðsgátt

Drög stefnu í málefnum hönnunar og arkitektúrs hefur nú verið birt í samráðsgátt stjórnvalda af Menningar- og viðskiptaráðuneyti. 

Stefnan inniheldur framtíðarsýn og markmið sem ætlað er að auka lífsgæði, skapa verðmæti og auka sjálfbærni með markvissri áherslu á málefni hönnunar og arkitektúrs.

Stefnan er unnin í breiðu samráði og þvert á ráðuneyti. Menningar- og viðskiptaráðuneyti í samstarfi við Miðstöð hönnunar og arkitektúrs leiðir vinnuna við mótun stefnu í málefnum hönnunar og arkitektúrs. 

Öflugur hópur fag- og hagaðila hefur komið að vinnunni á öllum stigum. 

Í lok maí fór fram vinnufundur vegna nýrrar hönnunarstefnu stjórnvalda í Grósku þar sem breiður hópur rýndi áherslusvið, mótaði aðgerðir, skilgreindi hindranir og forgangsraðaði. Hópstjórar unnu í kjölfarið úr tillögum sem starfsmenn ráðuneytis og Miðstöðvar hönnunar og arkitektúrs hafa dregið saman og sett fram í stefnuskjali.

Vinnan byggir á fyrri stefnuvinnu: 

• Opnu stefnumóti hönnuða, arkitekta og hagaðila í júní 2021.
• Hönnun í öllum geirum, stefnumótun frá 2018, unnin fyrir tilstuðlan atvinnuvega- og nýsköpunarráðuneytis.
• Hönnunarstefna stjórnvalda 2014-2018 - hönnun sem drifkraftur til framtíðar. Verkefnið unnið fyrir tilstuðlan iðnaðarráðuneytis, mennta- og menningarnmálaráðuneytis og Hönnunarmiðstöðvar Íslands.

Framundan er vinna við að útfæra og fjármagna aðgerðir sem byggja á henni.