Fyrirlestur um Vík Prjónsdóttur í Listasafni Sigurjóns í Laugarnesi

Árið 2025 eru 20 ár frá því að Vík Prjónsdóttir kynnti sína fyrstu vörulínu. Hönnuðurnir Brynhildur Pálsdóttir og Guðfinna Mjöll Magnúsdóttir munu halda fyrirlestur um verkefnið í Lista­safni Sigur­jóns Ólafs­son­ar þriðju­dags­kvöld­ið 11. mars næst­kom­andi klukk­an 20:00.

Vík Prjóns­dóttur var stofnuð árið 2005 af Hrafn­keli Birgis­syni, Guð­finnu Mjöll Magnús­dótt­ur, Bryn­hild­i Páls­dótt­ur, Þuríði Rós Sigurþórsdóttur og Agli Kal­evi Karls­syni. Það sem gerði verkefn­ið ein­stakt var sam­starf þeirra og Þór­is Kjart­ans­son­ar fram­kvæmda­stjóra Víkur­prjóns og ann­arra starfs­manna verksmiðj­unn­ar sem þá var elsta starf­andi prjóna­verk­smiðja lands­ins. Á þess­um ár­um var ull og prjón­avörur ekki í tísku en vörur Vík Prjónsdóttur höfðu mikil og mót­andi áhrif á þá hönn­uði sem á eftir fylgdu. Sköp­unar­kraft­ur­inn var eins og sprengja, nú­tíma­leg hönn­un, form og lita­val komu eins og fersk­ur and­blær inn í íslensk­an hönn­unar­heim og skyndi­lega var ís­lensk prjóna­vara orð­in spenn­andi og töff.

Fyrirlesturinn er hluti af Prjónavetri í Listasafni Sigurjóns en verkefnið er röð stuttra sýn­inga og við­burða vet­ur­inn 2024−25, þar sem ljósi er varp­að á prjóna­hönn­un og stöðu ís­lensks prjóna­iðn­að­ar. Mark­mið­ið er að kynna hluta af þeirri flóru prjóna­hönn­un­ar sem hef­ur verið fram­leidd á Ís­landi síð­ustu ár og opna um­ræðu um stöðu ís­lensks prjóna­iðn­að­ar fyrr, nú, og til fram­tíðar.

Vík Prjónsdóttir náði fljótt athygli ekki aðeins hérlendis heldur út um heim allan. Hönnunarteymið ferðaðist heimsálfa á milli en eftirspurn eftir fyrirlestrum og kynningum um verkefnið var mikil, þá sérstaklega með tilliti til þess hvernig hönnuðurnir tengdu sögu og menningu landsins við hönnunarvöru. Vík Prjónsdóttir er í dag þekkt fyrir frumlega hönnuð teppi og fatnað úr íslenskri ull. Þjóðsögur, náttúran og töfrar hversdagsins voru helsti innblástur að verkunum. Mikið hefur gerst á þessum 20 árum. Víkurprjón var selt, verksmiðjan lögð niður á Vík og flutti Vík Prjónsdóttir framleiðslu sína til Glófa í Reykjavík, Hrafnkell og Egill sögðu skilið við verkefnið og eftirlíkingar af skegghúfunum vinsælu seljast enn úti í heimi. En eftir stendur Vík Prjónsdóttir, reynslubanki hönnuðanna og einstakar tímalausar vörur.