James Cook tilnefnd til Hönnunarverðlauna Íslands 2024
Peysan James Cook, hönnun Helgu Lilju Magnúsdóttur fyrir BAHNS (Bið að heilsa niðrí slipp) er tilnefnd í flokknum vara ársins á Hönnunarverðlaunum Íslands 2024. Verðlaunin fara fram 7. nóvember.
Rökstuðningur dómnefndar:
Peysan James Cook er frábært dæmi um jákvæð félagsleg áhrif góðrar hönnunar. Með tímanum hefur orðið til samfélag unnenda peysunnar sem með réttu má kallast nútímaklassík í íslenskri hönnun. Fatahönnuðurinn Helga Lilja Magnúsdóttir hefur búið til einkennandi mynstursheim sem sækir innblástur í sjómennsku, en mynstrið er jafnframt að finna í sundfatnaði BAHNS og ýmsum annarskonar prjónaflíkum. Peysan hentar öllum kynjum og aldurshópum og er framleidd í takmörkuðu upplagi í mismunandi litaútfærslum og því felst í henni ríkt söfnunargildi.
BAHNS fer ekki að dæmi tískuiðnaðarins um að setja nýjar vörur á markað árvisst. Prjón er í eðli sínu umhverfisvæn aðferð við að framleiða fatnað þar sem litlu hráefni er sóað. Hönnun og gerð peysanna miðar einnig að löngum líftíma þeirra og góðri endingu.
Um:
Fatamerkið BAHNS var sett á laggirnar árið 2015 og er hannað af Helgu Lilju Magnúsdóttur. Hún útskrifaðist sem fatahönnuður frá Listaháskóla Íslands árið 2006 en stundaði einnig nám við Gerrit Rietveld í Amsterdam. Helga Lilja er eigandi og hönnuður fatamerkisins Helicopter, vann um árabil sem aðstoðarhönnuður NIKITA og hefur unnið samstörf með merkjum og fyrirtækjum á Íslandi svo sem UN women, Cintamani og Hvammsvík og er einn eigenda Kiosk Granda að Grandagarði 35.
Verðlaunaafhending Hönnunarverðlauna Íslands 2024 fer fram í Grósku þann 7. nóvember næstkomandi ásamt samtali því tengdu. Taktu daginn frá!
Fylgstu með næstu daga er við tilkynnum tilnefningar til Hönnunarverðlauna Íslands 2024.
Hönnunarverðlaun Íslands varpa ljósi á mikilvægi og gæði hönnunar og arkitektúrs á Íslandi með áherslu á áhrif þeirra á lífsgæði, verðmætasköpun og sjálfbærni fyrir samfélagið allt. Verðlaunaflokkum var fjölgað í þrjá í fyrra undir heitunum Verk // Staður // Vara.
Dómnefnd tilnefnir þrjú verkefni í hverjum flokki og af þeim hlýtur einn sigurvegari í hverjum flokki Hönnunarverðlaun Íslands 2024 sem eru hvor tveggja heiðurs- og peningaverðlaun. Auk þess verður veitt viðurkenning fyrir bestu fjárfestingu í hönnun og Heiðursverðlaun Hönnunarverðlauna Íslands.
Það er Miðstöð hönnunar og arkitektúrs sem stendur að verðlaununum, í samstarfi við Hönnunarsafn Íslands, Listaháskóla Íslands, Íslandsstofu, Samtök iðnaðarins, Húsnæðis- og mannvirkjastofnun, Vísindagarða Háskóla Íslands og Grósku.