Leitin að framúrskarandi verkum á sviði hönnunar og arkitektúrs á Íslandi er hafin

Búið er að opna fyrir ábendingar til Hönnunarverðlauna Íslands 2021. Hægt er að benda á eigin verk eða annarra til miðnættis 5. september næstkomandi. Markmið þess að senda inn ábendingar er að tryggja að afburða verk fari ekki fram hjá dómnefnd.

Hægt er að benda á verk í tveimur flokkum, Hönnunarverðlaun Íslands  2021 og Besta fjárfesting ársins 2021 í hönnun. Vinningshafar geta komið úr öllum greinum hönnunar en þurfa að skara verulega fram úr með verkefni sínu eða vinnu. Áætlað er að verðlaunaafhending fari fram í lok október. 

Til að hljóta Hönnunarverðlaun Íslands þurfa hönnuðir að vera félagar í einu af aðildarfélögum Miðstöðvar hönnunar og arkitektúrs eða vera fagmenn á sínu sviði. 

Ný verk teljast til þeirra verka sem lokið hefur verið við á síðustu þremur árum fyrir afhendingu verðlaunanna. Tekið er tillit til eðlismunar á hönnunargreinunum í þessu samhengi þar sem verkefni taka mislangan tíma og í sumum tilfellum mörg ár. 

Besta fjárfesting í hönnun er viðurkenning veitt fyrirtæki sem hefur með eftirtektarverðum hætti fjárfest í hönnun og arkitektúr eða innleitt aðferðir hönnunar í grunnstarfsemi sína. Fyrirtæki sem eiga þess kost að hljóta viðurkenninguna hafa hönnun og arkitekúr að leiðarljósi frá upphafi verka til að auka verðmætasköpun og samkeppnishæfni. Öll fyrirtæki sem starfa á Íslandi koma til greina.

Hægt er að benda á eigin verk og verk annarra til miðnættis sunnudaginn 5. september næstkomandi. Markmið þess að senda inn ábendingar er að tryggja að afburða verk fari ekki fram hjá dómnefnd og því hvetjum við sem flesta til að senda inn ábendingar sem og eigendur góðra verka til þess að tilnefna eigin verk. 


Hönnunarverðlaun Íslands eru peningaverðlaun að upphæð 1.000.000 krónur, sem hafa verið veitt af ráðherra ferðamála, iðnaðar- og nýsköpunar.

Dómnefnd í ár er skipuð þeim Sigríði Sigurjónsdóttur, formaður dómnefndar, forstöðumaður Hönnunarsafns Íslands og fyrrum prófessor í vöruhönnun við Listaháskóla Ísland, Þorleifi Gíslasyni, grafískum hönnuði, Rögnu Fróðadóttur, textílhönnuði, Hildigunni Sverrisdóttur, arkitekt og deildarforseti arkitektúrdeildar Listaháskóla Íslands, Katarina Siltavuori, framkvæmdastjóri Archinfo í Finnlandi og Margréti Kristínu Sigurðardóttur, almannatengsla- og samskiptastjóra Samtaka iðnaðarins.