Jólakettir úr notuðum barnafötum frá Fléttu fyrir Rammagerðina

Jólakettir úr notuðum barnafötum frá Rauða krossinum á Íslandi prýða þessa dagana glugga Rammagerðarinnar á Skólavörðustíg 12. Rammagerðin fékk vöruhönnuðina Birtu Rós Brynjólfsdóttur og Hrefnu Sigurðardóttur til liðs við sig til að hanna jólakött ársins 2020, sem í framhaldi verður árlegur viðburður og nýir íslenskir hönnuðir valdir til að túlka þennan fræga kött.

„Það er líka svolítið vinna að hanna vöru sem fellur að þeirra hugmyndafræði sem við höfum tileinkað okkur sem hönnuðir,“ segir Hrefna Sigurðardóttir í viðtali við Hús & Híbýli „vegna þess að við höfum sett okkur ákveðnar skorður í okkar hönnun. Við hönnum ekki úr hverju sem er heldur endurnýtum mikið notaða hluti og sækjum efnisvið í nærumhverfið, með umhverfisvænar vinnsluaðferðir að leiðarljósi. Þetta var því svolítil vinna en mjög skemmtilegt.“

„Þegar Rammagerðin nálgaðist okkur með það verkefni að búa til jólakött fengum við frjálsar hendur með hvernig við nálguðust það og ákváðum því að hafa það í anda þess sem við höfum áður gert. Við fórum í smá heimildavinnu og lásum okkur til um jólaköttinn, sem er kannski einna helst þekktur fyrir að éta börn sem ekki fá flíkur fyrir jólin, og okkur fannst skemmtilegt að leika okkur aðeins með þá pælingu. Þannig kviknaði þessi hugmynd, að búa til jólakött sem væri gerður úr notuðum barnafötum,“ útskýrir Birta Rós í viðtalinu við Hús&Híbýli.

Birta og Hrefna reka saman hönnunarstofuna Fléttu, en þær fást við endurnýtt efni í sinni hönnun. Meðal fyrri verka Fléttu eru loftljós, borð, lampar og hillur úr gömlum verðlaunagripum og gólfmottur úr notuðum gallabuxum. Hrefna og Birta hafa í tvígang hlotið hönnunarverðlaun The Reykjavík Grapevine fyrir vörur ársins 2019 og fyrir vörulínu ársins árið 2020.

Kettirnir eru framleiddir í takmörkuðu upplagi og verða þeir eingöngu fáanlegir í verslun Rammagerðarinnar á Skólavörðustíg 12 jólin 2020.