Opnað fyrir innsendingar í FÍT keppnina í tuttugasta skipti
Opnað hefur verið fyrir innsendingar í FÍT keppnina og er tekið við innsendingum til 15. febrúar. Verðlaunahátíð FÍT verður haldin í tuttugasta skipti 18. maí og eru vonir bundnar við að geta haldið veglega hátíð þar sem verðlaunuðum og viðurkenndum verkum er fagnað.
Félag íslenskra teiknara, FÍT, hvetur alla til að senda inn verk sem voru unnin á liðnu ári og minna á að félagsmenn FÍT greiða lægri innsendingargjöld. Allar upplýsingar um skil í keppnina er að finna hér. Þar er hægt að sækja PDF leiðbeiningar um flokkana, leiðbeiningar um skilaferlið og sniðmát til þess að fylla inn.
Verðlaunahátíð FÍT verður haldin í tuttugasta skipti þann 18. maí næstkomandi og eru vonir bundnar við að geta haldið veglega hátíð þar sem verðlaunuðum og viðurkenndum verkum er fagnað. Staðsetning og nákvæmari útfærsla verður auglýst síðar. Í framhaldi verður verðlaunasýning FÍT opnuð samhliða HönnunarMars eins og undanfarin ár.
Keppnin nýtur sívaxandi vinsælda og virðingar meðal hönnuða og félagsmanna FÍT. Verðlaunin eru gæðastimpill fyrir grafíska hönnun á Íslandi og kemur verkum keppenda og fyrirtækja á framfæri og staðsetur þau í hópi þeirra bestu. Einnig hljóta verðlaunuð og viðurkennd verk þátttökurétt í Evrópuverðlaunum fagfélaga ADC*E (Art Directors Club of Europe) sem FÍT er aðili að.
Fyrir áhugasama grafíska hönnuði og myndhöfunda er alltaf hægt að senda FÍT póst á almennt@teiknarar.is og fá að vita meira um félagið og starfssemi þess. Sömuleiðis er hægt að skrá sig í félagið, lesa fréttir og fá upplýsinga á heimasíðu FÍT hér.
