Samkeppni um byggingu stúdentagarða - Myndir í betri upplausn

Myndir af Klettaborg og Borgarbraut eru nú komnar inn á vefinn okkar í betri upplausn (34,2MB). Skil í samkeppnina eru fimmtudaginn 25. janúar 2024.

Frekari upplýsingar um samkeppnina:

Félagsstofnun stúdenta Akureyri (FÉSTA) í samstarfi við Arkitektafélag Íslands efnir til framkvæmdasamkeppni um hönnun á nýjum stúdentagörðum. Samkeppnissvæðið er innan háskólasvæðis Háskólans á Akureyri (HA), nánar tiltekið á austurjaðri þess og meðfram Dalsbraut. Samkeppnissvæðinu er skipt upp í tvær lóðir. Uppbygging stúdentagarðanna er fyrirhuguð í tveimur áföngum, fyrri áfanginn yrði uppbygging á nyrðri lóðinni og seinni áfanginn yrði á syðri lóðinni. Áætlaður framkvæmdatími fyrri áfanga er vorið 2025, tilbúið til notkunar haustið 2026.

Meginmarkmið samkeppninnar er að fá tillögu sem gerir FÉSTA kleift að byggja bjartar og aðlaðandi íbúðir í góðu samræmi við húsnæðisþarfir nemenda HA. Áhersla er á vistvænt skipulag, vistvottaðar byggingar og blágrænar ofanvatnslausnir. Byggingar skulu falla vel að landslagi og endurspegla góða byggingarlist. Horft er til að formun á innra og ytra rými sé sannfærandi og hvetji til samveru og auki á félagsfærni og vellíðan íbúa. Miða skal við að allur frágangur bygginga og lóða sé vandaður og endingargóður. Lögð er áhersla á aðlaðandi umhverfi í samræmi við stefnu FÉSTA um uppbyggingu stúdentagarða.

Megináherslur dómnefndar

Að tillagan sé heildstæð og byggi á vandaðri og góðri byggingarlist.
Að gæði, notagildi og fyrirkomulag endurspegli framsækna hönnun.
Að ásýnd bygginganna og lóða falli vel að nánasta umhverfi.
Að aðgengis- og öryggismál séu vel leyst.
Að hönnun hvetji til félagslegrar virkni íbúa.
Að horft sé til umhverfisáhrifa bygginganna og vistvænnar hönnunar.
Að byggingarefni og lausnir uppfylli kröfur um hagkvæmni og góða endingu.

Verðlaunafé

1. verðlaun eru kr. 5.000.000.-
2. verðlaun eru kr. 3.000.000.-.
3. verðlaun eru kr. 2.000.000.-

Dómnefnd

Tilnefndir af Arkitektafélagi Íslands

Hildur Ýr Ottósdóttir, arkitekt EPF-FAÍ
Ingunn Lillendahl, arkitekt FAÍ

Tilnefndir af verkkaupa

Ágúst hafsteinss, arkitekt FAÍ
Hólmar Erlu Svansson, stjórnarmaður FÉSTA
Jóhannes Baldur Guðmundsson, framkvæmdastjóri FÉSTA

Trúnaðarmaður

Gerður Jónsdóttir, frkv.stj. AÍ, trunadarmadur@ai.is

Lykil dagsetningar

16. október 2023 - Keppnislýsing gefin út.
26. október 2023 - Skoðunarferð og kynning á verkefninu. (Heimsókn verður einnig í boði á Teams og tekin upp á síma og ekki í fullkomnum gæðum).
9. nóvember 2023 - Fyrirspurnatíma lýkur.
13. nóvember 2023 - Fyrirspurnum svarað.
25. janúar 2024 - Keppendur skila inn tillögum.
22. febrúar 2024 - Niðurstaða dómnefndar liggur fyrir.