Hönnunarteymið B&A&R&J valið úr hópi umsækjenda til að hanna hönnunarkerfi fyrir Íslandsstofu
Íslandsstofa auglýsti, í samstarfi við Miðstöð hönnunar og arkitektúrs, eftir að hönnuði eða hönnunarteymi til að leiða vinnu við gerð hönnunarkerfis fyrir samræmt útlit sýningarbása á vegum Íslandsstofu.
Alls bárust 10 sterkar umsóknir um verkefnið og eftir valferli var ákveðið að bjóða hönnunarteyminu B&A&R&J verkefnið.
Teymið er skipað þeim Baldri Helga Snorrasyni arkitekt, Jóni Helga Hólmgeirssyni,vöru-og samspilshönnuði (e. Interaction design), Adrian Freyr Rodriguez verkfræðingi og Ragnari Má Nikulássyni, grafískum hönnuði og myndlistamanni. Ráðgjafi teymisins er Björn Steinar Blumenstein vöruhönnuður.
„Við erum hrikalega spenntir að vinna að þessu verkefni með Íslandsstofu. Þetta er náttúrulega mikil áskorun þar sem að hönnunarkerfi af þessu tagi þarf að geta aðlagast gríðarlega fjöbreyttum aðstæðum, það mun þó án efa fæða af sér áhugaverðar lausnir. Þetta er mikill heiður og við hlökkum til samstarfsins við Íslandsstofu.“
Hönnunarteymið B&A&R&J
Markmið verkefnisins er að skapa heildræna umgjörð utan um framsetningu sýningarsvæða Íslandsstofu, þvert á áherslur Íslandsstofu í erlendu markaðs- og kynningarstarfi eins og þær eru settar fram í stefnumótun fyrir íslenskar útflutningsgreinar. Þá er einnig mikilvægt að hönnunin sé í samræmi við, og fari vel með, vörumerkjakerfi íslenskra útflutningsgreina. Lestu meira hér.
„Það sem stendur upp úr í þessu ferli er hve ríkt íslenskt hönnunarsamfélag er af framúrskarandi fagfólki. Það var ljóst frá því að umsóknarfrestur rann út að það yrði úr vöndu að ráða fyrir okkur. Við fengum fjölda sterkra umsókna og það má segja að það hafi verið lúxusvandamál að þurfa að velja úr þeim. Eftir vandlega yfirferð valnefndar var það þó einróma niðurstaða að þetta verkefni ætti best heima hjá hönnunarteyminu B&A&R&J. Það sem talaði mest til okkar í umsókn þeirra var áhersla á einfaldar, tæknilegar lausnir og samspil hönnunar og upplifunar. Við hlökkum mikið til að taka þetta verkefni áfram með þeim.”
Sveinn Birkir Björnsson, forstöðumaður markaðssamskipta Íslandsstofu.
Í valnefnd sátu Sveinn Birkir Björnsson, forstöðumaður markaðssamskipta hjá Íslandsstofu, Margrét Helga Jóhannsdóttir, fagstjóri sýninga hjá Íslandsstofu, Rósa Hrund Kristjánsdóttir, Creative director, Hvíta húsið, Ómar Sigurbergsson, innanhússarkitekt, Funkis og Helgi Steinar Helgason, arkitekt, Tvíhorf.
